कोचरगाव हे नाशिक जिल्ह्यातील दिंडोरी तालुक्याच्या पश्चिम भागातील एक महत्त्वाचे आदिवासी बहुल गाव आहे. २०११ च्या जनगणनेनुसार येथील लोकसंख्या ५९६९ इतकी आहे. निसर्गाच्या सान्निध्यात वसलेले हे गाव घाटमाथ्याच्या परिसरात येते. गावाच्या दक्षिणेस नाशिक तालुका तर पश्चिमेस पेठ तालुका हद्द जोडलेले आहेत. कोचरगाव हे मुख्य गाव असून यामध्ये सोनगाव हे स्वतंत्र महसुली गाव आहे. तसेच पत्र्याचापाडा, वाघदरा, गोलदरी अशा लहान वस्त्याही या गावाच्या परिसरात आहेत.

गावातील ग्रामस्थांना शासकीय कामकाजासाठी बाहेरच्या ठिकाणी जावे लागत नाही. कारण गावामध्येच “आपले सरकार सेवा केंद्र” उपलब्ध असून यामार्फत विविध शासकीय दाखले, कागदपत्रे मिळण्याची सुविधा आहे. तसेच गावात प्राथमिक आरोग्य केंद्र असून त्याचबरोबर २ प्राथमिक आरोग्य उपकेंद्रेही कार्यरत आहेत. ग्रामस्थांच्या आरोग्य सेवेसाठी ही सोय अत्यंत उपयुक्त ठरते. याशिवाय गावात एकूण ७ अंगणवाडी केंद्रे असून लहान मुलांच्या संगोपन व शिक्षणाची सुविधा उपलब्ध आहे.  शिक्षणाच्या दृष्टीनेही कोचरगाव प्रगत आहे. गावात इयत्ता १ ली ते १२ वी पर्यंत शाळा उपलब्ध आहे. उच्च शिक्षणाची गरज पूर्ण करण्यासाठी महाविद्यालय देखील येथे चालवले जाते. त्यामुळे गावातील विद्यार्थ्यांना शिक्षणासाठी दूरवर जावे लागत नाही.

शेती हा येथील लोकांचा प्रमुख व्यवसाय असून गावात भात, भुईमुग, गहू, मका, बाजरी ही मुख्य पिके घेतली जातात. याशिवाय भाजीपाला पिकांमध्ये टमाटे आणि वांगी मोठ्या प्रमाणावर लागवड केली जाते. शेतीमुळे गावाच्या अर्थव्यवस्थेला मजबुती मिळते.  गावाच्या आसपासचे नैसर्गिक वातावरणही विशेष उल्लेखनीय आहे. गावालगत आळंदी धरण आहे, जे ०४ डिसेंबर १९५४ रोजी बांधण्यात आले. हे धरण गावाच्या ओळखीचा एक महत्त्वाचा भाग आहे आणि पाण्याच्या साठ्यामुळे शेतीला मोठी मदत मिळते.  नाशिक शहरापासून कोचरगावचे अंतर २५ किलोमीटर तर दिंडोरीपासून २२ किलोमीटर आहे. त्यामुळे प्रशासकीय, शैक्षणिक व व्यापारी दृष्टीनेही गावाला जवळच्या केंद्रांशी संपर्क साधणे सोयीचे ठरते. एकंदरित, कोचरगाव हे शिक्षण, आरोग्य, शेती आणि शासकीय सुविधा या सर्व बाबतीत विकसित होत असलेले गाव आहे.